Ako po si Ellen Miguel Rapisora, 52 taong gulang, may anim na anak, at isang simpleng maybahay ni Rodrigo. Naging miyembro po ako noong Setyembre 2018, at sa loob ng pitong taon ay napakalaki na po ng naitulong sa amin ng BB—lalo na sa mga gastusin sa bahay tulad ng ilaw, tubig, at iba pang bayarin. Malaki rin po ang naitulong ng BB sa pagpapaaral ng apat ko pang anak na kasalukuyang nag-aaral. Nakakadagdag po ito sa kanilang mga pangangailangan sa paaralan. Nakatulong din po ang BB sa pagpapaganda ng aming munting tahanan—nakapagpa-tiles na po kami ng aming sahig, at ngayon ay unti-unti na rin po kaming nakakabili ng mga kagamitan para sa loob ng bahay. Maraming-maraming salamat po sa iyo, BBSAMAMUCO, sa lahat ng tulong na ibinigay mo sa aming pamilya, at sa mga tulong pang darating sa patuloy na pag-abot namin sa aming mga pangarap sa buhay. Kasama ka po namin sa aming tagumpay. Mabuhay ang BBSAMAMUCO

Ako si Elmeda Bisares, miyembro ng ating sintang kooperatiba mula pa noong 2019. Isang asawa at ina ng apat na anak. Sa kabila ng maraming hamon sa buhay, hindi ko kailanman inisip na sumuko sa pangarap na mabigyan ng magandang kinabukasan ang aking pamilya. Bilang isang ina, araw-araw akong nagsusumikap upang matugunan ang kanilang mga pangangailangan, lalo na sa edukasyon, katuwang ang aking asawa. Ako po ay isang masahista, ahente, negosyante, at kung ano-ano pang pagkakakitaan ay aking pinasok para maitawid ang pang-araw-araw na buhay. Hangad ko lamang ang maayos na kinabukasan para sa aking mga anak. Noong taong 2019, ako ay naimbitahan at nabigyan ng pagkakataong maging miyembro ng BBSAMAMUCO Cooperative. Sa simula, ako ay nag-alinlangan, ngunit hindi ko inakalang ganoon kalaki ang maitutulong nito sa akin at sa aking pamilya. Hindi nagtagal, naranasan ko ang mga benepisyo ng pagiging miyembro: loan na may mababang interes, financial literacy seminars, at suporta sa kabuhayan. Sa tulong ng BBSAMAMUCO, unti-unti kong nalampasan ang mga pagsubok ng buhay kasama ang aking pamilya. Biyaya para sa aking anak Isa sa pinakamalaking biyaya na naibigay ng kooperatiba ay ang tulong nila sa aking anak na si Derek Andrei Bisares. Siya ay nagtapos ng kolehiyo noong 2024 at kinakailangang sumailalim sa On-the-Job Training (OJT). Sa pamamagitan ng BBSAMAMUCO, nabigyan siya ng pagkakataon na maisagawa ang OJT, kung saan hindi lamang nadagdagan ang kanyang praktikal na kaalaman, kundi nasaksihan din namin ang tunay na malasakit ng kooperatiba—hindi lamang sa mga miyembro, kundi pati sa mga kabataang nangangarap. At nagbunga ito—nagtapos si Derek Andrei Bisares sa Pamantasan ng Lungsod ng Marikina, sa kursong Bachelor of Science in Business Administration, Major in Marketing Management, at nakamit ang karangalang Cum Laude. Isang tagumpay na hindi lamang para sa kanya, kundi para sa aming buong pamilya. Ang dating pangarap ay naging isang realidad. At hindi pa doon natapos ang biyaya. Binigyan muli siya ng pagkakataon ng kooperatiba—siya ay natanggap at kasalukuyang nagtatrabaho bilang office staff sa BBSAMAMUCO. Bilang ina, isa itong napakalaking saya, dahil unti-unti niyang natutupad ang kanyang mga pangarap, kasama ang mga taong tunay na sumusuporta at naniniwala sa kanya. Isang kwento ng pag-asa at tagumpay Patunay ang aming kwento na kayang baguhin ng tamang suporta, tiyaga, at kooperasyon ang takbo ng buhay. Hindi lamang ako ang natulungan ng kooperatiba, kundi maging ang aking anak na ngayon ay naglilingkod din sa organisasyong minsang naging sandigan namin. Sa aking puso, hinding-hindi ko malilimutan ang papel ng BBSAMAMUCO Cooperative—isang kwentong puno ng pag-asa, tagumpay, at walang hanggang pasasalamat. Tulad ng Birhen ng Bayan ng San Mateo Multi-Purpose Cooperative, na 25 taong matatag at patuloy nagbibigay ng pag-asa sa bawat miyembro— Mabuhay ka, BBSAMAMUCO!

Ako po si Mary Joy Procalla Dela Paz, isang proud na miyembro ng Birhen ng Bayan ng San Mateo Multi-Purpose Cooperative – SMR mula Enero 2020, at patuloy na kasapi hanggang sa kasalukuyan—limang taon na ng tiwala at suporta. Nais ko pong iparating ang aking lubos na pasasalamat sa BBSAMAMUCO SMR dahil sa mga tulong na naipagkaloob sa akin, lalo na sa mga panahong ako’y nahihirapan at wala nang ibang malapitan. Una, malaki ang naitulong ng kooperatiba nang mabigyan ako ng pagkakataong makapag-avail ng Memorial Loan upang makabili ng lote sa Paraiso. Dahil dito, nagkaroon ng maayos at marangal na himlayan ang aking yumaong biyenan. Pangalawa, nang magkasakit at ma-ospital ang aming ina, napilitan akong mangutang sa iba’t ibang tao at kamag-anak. Kasama doon ang hindi magandang salita at pressure na agad bayaran ang utang. Muli akong lumapit sa kooperatiba at nabigyan ako ng Special Loan na nakatulong upang mabayaran ko nang maayos ang lahat ng pagkakautang namin. Pangatlo, naging malaking katuwang din ng kooperatiba ang aming pamilya sa pagpapagawa at pagpapaganda ng aming tahanan. Unti-unti naming napapaunlad ang aming tirahan dahil sa kanilang tulong. At higit sa lahat, sa panahon ng kalamidad at sakuna, hindi rin ako napabayaan ng kooperatiba. Ako ay nakatanggap ng Ayuda, at nakapag-avail ng Calamity Loan, na labis na nakatulong upang makabangon kami mula sa hirap na dulot ng mga bagyo.